Предавања во гостиварските училишта – како да се заштитат од дрога, алкохол и трговија со луѓе

Полицијата ќе ги едуцира полуматурантите за негативните последици од користење наркотични дроги и конзумирање алкохол, но и за законските одредби кои се однесуваат на овие општествено девијантни појави. Предавањата се организираат во рамки на два нови превентивно-едукативни проекти„Превенција од злоупотреба на дроги и алкохол“ и „Превенција од трговија со луѓе-деца“.

„Предавањата ќе ги одржуваат стручно обучени полициски службеници, кои ќе ги запознаат деветоодделенците за последиците од дроги, алкохол и што претставува трговијата со луге и како најефикасно да се заштитат од истата. Првите предавања веќе стартуваа во гостиварските основни училишта, по што ќе продолжат и во другите, со цел да се подигне свеста кај највозрасните основци за опасностите што со себе ги носат дрогата и алкохолот, меѓутоа и трговијата со луѓе, во чии канџи неретко завршуваат и малолетни деца, најчесто од асоцијални и нефункционални семејства, но и други“, соопштија од СВР Тетово.

Носител на проектите, кои ќе траат два месеци  е Отсекот за превенција, во соработка со локалната самоуправа. Со проектите ќе бидат опфатени над 3000 ученици од деветто одделение во Гостивар и во Тетово.