Предметот за партијата Алијанса за Албанците вратен на повторно судење

Апелациониот суд го врати предметот на политичката партија Алијанса за Албанците на повторно судење во Основниот суд Тетово и ги прифати жалбите на правниот застапник на Арбен Таравари, информираа од партијата.

„Апелациониот суд го враќа предметот на повторно судење по претходната одлука донесена од Основниот суд Тетово, каде што се одолговлекуваше и се менуваа неколку судии додека не се донесе скандалозната одлука под притисок на поранешниот министер за правда Кренар Лога, партиските печати да и припаднат на фракцијата што и се придружи на ДУИ. Имајќи ги предвид доказите депонирани во Апелациониот суд во Гостивар, се очекува конечната одлука да биде во наша корист и партијата заедно со печатите да остане кај нејзиниот легитимен претседател Арбен Таравари.“ , се вели во соопштението.

АА се подели на две крила, едното на Таравари и другото на Зијадин Села, по што се случуваа  паралелни конгреси, се носеа паралелни партиски одлуки и дојде до судска процедура, каде одлуката падна дека печатите му припаѓаат на Села. Сега за предметот повторно ќе се суди.