Предновогодишна радост и хуманост споени во настан на плоштадот во Гостивар

Првиот ден од хуманитарниот предновогодишен хепенинг на градскиот плоштад во Гостивар помина во весела атмосфера, со интерес и внимание од гостиварци, особено од најмладите. Со радост и возбуда се фотографираа со омилениот Дедо Мраз и се дружеа со останатите учесници, не заборавајќи да ја покажат својата хуманост преку донации.

„Штандот денес го посетија многу дечиња и граѓани кои со задоволство донираат средства, за што пак добиваат подарок, рачни изработки кои учениците од техничкото училиште посветено ги правеа цели три месеци. За подарување добивме и новогодишни честитки изработени од вредните раце на дечињата од градинките „Детска радост“. Неизмерно сме благодарни на сите што се вклучија и даваат свој придонес за успешен настан.“, рече Валентина Тасеска од Здружението за култура, спорт и образование ,,Анисија“, во чија организација е хепенингот.

Собраните средства во соработка со  здружението Whren in Trouble и Центарот за социјални работи ќе се наменат за ранливи категории деца, семејства во зависност од потребата.

Хепенингот продолжува и во следните два дена во периодот од 10 до 15 часот.