Предновогодишна журка во „Младост“ – КК Гостивар го пречекува Работнички (сабота, 17 часот)

Секој кошаркарски натпревар во Гостивар се следи со огромна страст и внимание, но дуелите како утрешниот, кој е последен од првиот дел од првенството, во трка за самиот врв на табелата, во период на предновогодишна еуфорија се сигурна најава дека најголемата предновогодишна журка ќе биде во Младост, сабота од 17 часот.

Гостува најтрофејниот македонски кошаркарски клуб, Работнички. Клуб за кој не потребно многу да се објаснува. „Центарци“ сезонава играат топло-ладно, но сепак во овој дуел влегуваат како второпласирани на табелата. Имаат скор од 7 победи и 3 порази. Мијатовиќ, Лесколт, Бенџамин, Младеновски, капитенот Николовски се добро познати имиња на кои победата им е секогаш императив.

Првиот дуел помеѓу овие две екипи во Градски парк сезонава е единствениот пораз по кој гостиварци може да жалат, целосно го надиграа противникот во текот на натпреварот, но во последните стотинки шокантно го загубија мечот. „Бело-сините“ со победата минатото коло против ФМП колку-толку ги залечија раните од поразите од Куманово и Пелистер, за целостно враќање на довербата, а и второто место на табелата на КК Гостивар потребна му е победа. После шест недели пауза деновие во гостиварскиот табор се врати и Александар Костоски, но дали ќе истрча на теренот ќе дознаеме во текот на натпреварот.

Ова е последен натпревар во оваа 2019 година во Гостивар, после тоа следи зимската пауза. Навивачите на Гостивар подолг период се подготвуваат за предновогодишниот дуел, најавени се неколку навивачки групи кои заеднички ќе го поддржат Гостивар.

Се разбира, МРТВ нема да пропушти да ја пренесува најголемата кошаркарска предновогошна журка во земјава, „во живо“ од градот на кошарката.