Предупредувачки протест на вработените во Царината

Вработени во Царинската управа, членки на Синдикатот на УПОЗ, денеска во тек на паузата одржаа предупредувачки протест пред зградата на управата, барајќи 30 проценти повика плата.

Како што појасни Трпе Деаноски, претседател на Синдикатот на УПОЗ,  вработените во Царината тие бараат правилна примена на член 67 став 3 од Закон за Царинска управа, во кој е наведено дека царинските службеници добиваат 30 проценти од платата како надополнување на редовната плата, поради посебните услови од работа како и поради посебна одговорност што произлегува од работното место.

Тој рече дека иако овој став е дел и од Колективниот договор, ниту еден вработен никогаш не го добил тој додаток.

„Со Законот за буџетите и со автентичното толкување на овој закон од Собранието, Министерството за финансии и сите органи во состав на Министерството, добија додаток на плата во висина од 30 проценти“, изјави Деаноски.

Овие вработени кои протестираат, дополни тој, го полнат државниот Буџет секоја година повеќе од 51 процент, носат оружја, вршат претреси, изложени се на висок ризик и не бараат ништо повеќе од тоа да се почитува законот и колективниот договор.

Во тек на протестот тие добија покана за средба со директорот на Царината Стефан Богоев, кој истакна дека не очекува  во ниту еден случај да не дојде до затворање на гранични премини,

„Со службите на Царинска управа, ќе разговараме што досега е направено, бидејќи и досега се направени работи во поглед на работничките права и условите за работа. Во координација со Управата за јавни приходи, која има сличен проблем, ќе разговараме со Министерството за финансии“, изјави Богоев.

Деаноски потенцираше дека протестот е за време на паузата и со него не се нарушува работниот процес, но оти не е исклучена можноста и за генерален штрајк на ниво на синдикат воопшто.