Предвелигденски настан за дечињата во Гостивар-Уметност, музика, радост, хуманост…

Големиот христијански празник Велигден носи трепет и среќа во срцата на сите верници, но секако најмногу му се радуваат најмалите. Токму за нивна радост и насмевки, а во духот на хуманоста и солидарноста, денес во Гостивар се одржа изложба на ликовни дела и изработки направени од децата од градинките и основните училишта. Градскиот плоштад беше полн со џагор и смеа, весели детски очи и претпразнична атмосфера.

На паноа и штандови беа изложени цртежи и разни украси со велигденски мотиви кои дечињата со гордост ги претставуваа на минувачите. Настанот се организираше на иницијатива на хуманитарното здружение на граѓани „Д-р Трајче Нешковски“ во соработка со Центарот за култура АСНОМ и Општина Гостивар.

„Целта е да се придонесе за празничната атмосфера, да се мотивираат децата на креативни активности, да цртаат, да изработуваат и при тоа да гсе вклучат во празнувањето. Има многу голем интерес за учество на настанот, дечињата се многу возбудени, со голема радост цртаа и изработуваа украси и навистина имаат направено прекрасни дела. Се надевам дека овој настан ќе прерасне во традиција“, рече Ема Нешковска како дел од организацијата.

Предвелигденски настан за дечињата во Гостивар

Децата на плоштадот имаа можност и да се забавуваат со музика преку настапите на Дорис Димовска, Теодора и Росица Матески, како и да се дружат со маскоти кои ги симболизираат велигденските празнувања-велигденско јајце и зајче.

Сите дела создадени од вредните детски раце ќе бидат подарени за традиционалниот хуманитарен базар кој ќе се одржи утре, на Велики Петок, во црквата Пресвета Богородица.