Препораки за заштита на животните од студениот бран

Агенцијата за храна и ветеринарство излезе со препораки до одгледувачите на животни, врзани со нивната заштита во денови на студен бран, силен ветер и снег. Надлежните советуваат за зимските месеци навремено да се обезбедат вода и храна за животните во доволни количини, храната да биде со соодветна хранлива вредност, на животните да не им се дава смрзната храна и да се зголеми вообичаената дневна количина особено кај гравидните животни, за да можат да ја одржуваат својата телесна температура.

„Животните не можат, а не треба своите потреби за вода да ги обезбедуваат преку лижење мраз или снег, затоа за истите треба да се обезбеди свежа вода за пиење, која е на соодветна температура. При појава на екстремно ниски температури проследени со силен ветер и снег животните треба да се држат затворени во објектите/шталите, или да им се обезбеди соодветно засолниште. Во овој случај треба да се внимава на хигиената во објектите, редовно да се чисти ѓубрето и да се заменува валканата простирка со нова. Доколку не постои можност веднаш да се засолнат животните, привремено може да се употребат ќебиња или друг вид на прекривки за нив, во тој случај треба да се внимава прекривките во секое време да бидат суви“, стои во препораките на Агенцијата.