Препукувања меѓу ДУИ и општината за в.д директорите во гостиварските училишта

По објавувањето на имињата на в.д директорите на училиштата во Гостивар, огранокот на ДУИ реагираше дека градоначалникот Арбен Таравари поставил непрофесионален и политизиран кадар да раководи со образованите институции.

-Таравари не ги испочитува училишните Совети во одлуките за именување на в.д директори, отстрани директори кои имаа мандат, а именуваше луѓе надвор од правните законски норми. Врв е поставувањето на претседателката на Форумот на жени на неговата партија за в.д директор во ОУ „Исмаил Ќемали“. Во неговите одлуки за „деполитизација“ на образованието нема ни “д“, стои во реакцијата на гостиварскиот огранок на ДУИ.

Од гостиварската локална самоуправа одговорија преку соопштение наведувајќи дека сите активности се преземени во согласност со професионалната квалификација, а не како во изминатиот период кога, како што тврдат, се гледала само партиската припадност.

– Одлуките кај нас не се носат само од страна на градоначалникот, туку од сите надлежни лица овластени со закон, заедно со градоначалникот. Заврши времето на диктаторите. ДУИ по се изгледа не знаат дека г-ѓа Шпреса Усеини не е претседател на Форумот на жени на Алијансата за Албанците, туку учителка која работи повеќе години, со висока стручност во ОУ “Исмаил Ќемали” и беше предложена за в.д од колективот на училиштето. Претседател на Форумот на Жените на Алијансата е г-ѓа. Афердита Мислими Хамза, за која сме горди што е во редовите на нашата група, се наведува во општинското соопштение.