Прес на СДСМ Гостивар: Може да се организираат 100% сигурни избори за граѓаните и за нивното здравје

„Новата нормалност значи и организирање на изборен процес согласно здравствените протоколи пропишани од надлежните институции. Избори може да се организираат и да бидат 100% сигурни избори за граѓаните, за нивното здравје, за сите учесници во изборниот процес, но само ако сите учесници во процесот ги почитуваат протоколите. Како што со заштитни мерки ги извршуваме нашите секојдневните обврски, пазариме во маркетите или посетување банка, така со заштитни мерки можеме да го искористиме демократското право да гласаме на избори и да си обезбедиме функционално Собрание и нова, политичка влада. Институциите имаат капацитет, на денот на гласањето да ги обезбедат сите превентивни мерки за целосна  заштита на гласачите и на сите други учесници во изборниот процес. Истовремено, политичките партии имаат обврска и одговорност да водат одговорни кампањи без масовни собири каде целосно ќе бидат запазени сите мерки на заштита.“, истакна претседателот на општинската организација на СДСМ во Гостивар, Драгољуб Филипоски на денешната прес конференција, додавајќи:

„На граѓаните, на државата, им се неопходни законодавна и извршна власт со полн капацитет и легитимитет. Само со такви институции со целосен легитимитет можеме полесно и побрзо да се справиме со здравствените и економски последици од коронакризата. Северна Македонија мора подготвено и со 100% капацитет да го дочека септември. Да бидеме целосно спремни за уште поефикасно справување со последиците од досегашниот тек на пандемијата и за очекуваниот нов бран на вирусот наесен.“

Филипоски рече дека борбата со коронавирусот треба да продолжи преку целосно почитување на мерките на лична заштита и а новата нормалност значи дека секојдневните обврски граѓаните ќе ги вршат согласно мерките.

„Тоа значи дека во таква нова нормалност ќе се одвиваат сите процеси во нашето општество, економијата ќе се враќа во нормала, ќе работиме и ќе вршиме сите обврски но со почитување на сите мерки. Со новата нормалност согласно протоколите за заштита ќе функционираат градинките, училиштата и факултетите, ќе функционираат театрите, кината и музеите, ќе функционираат угостителските објекти, фабриките и јавниот транспорт. Светот се отвара и враќа во нормала, тоа ќе го правиме и ние. Но, само од нас ќе зависи дали ќе ги поддржиме лекарите и ќе спречиме понатамошно ширење на вирусот или влошување на состојбите.“, изјави претседателот на ОО СДСМ Гостивар.