Прес на СДСМ Гостивар: Платите растат и во криза, блиску сме до ветувањето за просечна плата од 30.000 денари

На прес конференција што се одржа денес во Гостивар од Општинската организација на СДСМ се осврнаа на владините економски политики, кои, како што подвлекоа покажуваат дека се води грижа за заштита на економскиот стандард на граѓаните и квалитетот на живот воопшто.

„Економските политики кои ги спроведува Владата предводена од СДСМ, а кои се резултат на сериозни и детални анализи во широк консултативен процес и дијалог каде мислењата и предлозите од сите засегнати страни се земаат предвид при носењето на одлуките даваат видливи резултати, така што платите растат многу побрзо и значително, дури и во вакви тешки кризни услови. Овие политики со кои се овозможува поддршка на животниот стандард на сите наши граѓани се особено важни во време на глобална економска и енергетска криза. Со политиките кои ги презема Владата предводена од СДСМ, се забележува континуиран раст на платите во сите сектори, а тоа значи повеќе пари во семејниот буџет на граѓаните. Имено, минималната плата веќе ја покачивме на 18.000 денари, што е зголемување за двојно повеќе во однос на времето на ВМРО-ДПМНЕ кога истата изнесуваше едвај 8.800 денари. Со ваквото покачување на минималната плата, над 80.000 работници за својот труд ќе добиваат по 3.000 денари повеќе на нивната сметка почнувајќи од мартовската плата која се исплаќа во месец април. Повисоки плати ќе добиваат и работниците кои досега земале плати по 16 и 17.000 денари.“, истакна претседателот на гостиварските социјал-демократи, Игор Велjаноски додавајќи дека едно од најважните изборни ветувања, просечна плата од 30.000 денари, е блиску до исполнување, со тоа што во јануари 2022 година просечната плата изнесува 29.980 денари.

„Ова се реални, видливи податоци кои ја потврдуваат успешноста на економските политики на СДСМ. Покрај покачувањето на платите и пензиите, пример за тоа е и пакетот антикризни мерки од 400 милиони евра со кои меѓудругото се предвидува намалување на повластена стапка на ДДВ за основните производи за исхрана од 5% на 0%, замрзнување на маржите на основни производи за исхрана, субвенции/Ваучери за најранливите категории на граѓани за основни производи за исхрана, субвенции за пензионерите, намалување на акциза врз основа на берзанските цени, финансиска поддршка преку директно кредитирање од Развојна банка на РСМ на компаниите…Ова се само дел од антикризните мерки со кои во услови на глобална економска и енергетска криза им се помага и на граѓаните, но и на компаниите.“, рече Велјаноски.