Прес на Таравари: Трагедијата со девојчето не е предизвикана од небрежност

Градоначалникот на Гостивар, Арбен Таравари, денеска одржа прес конференција на која рече дека несреќниот случај во кој животот го загуби 17-годишно девојче, не е предизвикан од никаква небрежност.

„Според полицискиот извештај појаснето е зошто се случи несреќата, се што проилезе од гласините не е точно. Вистината е најтешка, тоа е нејзината загуба. На семејството Меџити и нам ни е јасно што се случи, знеме дека е несреќа што не е предизвикана од никаква небрежност, туку судбина која се поигрува со вакви трагедии. Секој новинар, граѓанин, политички аналитичар или криминалец е слободен да оди и подетално да се информира во полицијата за тоа што се случило“, рече градоначалникот.

Ние како општина за една година имаме преземено конкретни и сериозни чекори за решавање на проблемот со бездомните кучиња, но законите и бирократските процедури не ни овозможија поголема ефикасност.

„Состојбата е таква што е невозможно да се реши ваков проблем за една година. Од минатата власт наследивме едно расипано комбе и еден човек и хаос по улиците. Во меѓувреме создадовме служба и две екипи, прифатлиште кое пред пет месеци е комплетирано. Тоа е со дваесетина боксови и услови за прифаќање на животни. Не е во функција, бидејќи процедурите се заглавени во бирократските лавиринти, на управи одбори, комисии и не можеме да добиеме дозвола за работа“, рече Таравари

Градоначалникот Таравари на прес конференцијата уште еднаш упати апел со кој бара, трагичниот настан од пред два дена да не се користити во политички пресметки.

„И покрај гневот акумулиран овие денови јас и мојот тим нема да паднеме на ниво на посмртни кампањи, ќе ја сочуваме почитта кон споменот за ова девојче и за семејството Меџити“, рече Таравари.

Градоначалникот претходно им се извини на медиумите што доцни 15 минути на прес конференцијата. Како што рече тој родителот на починатото 17-годишно девојче било планирано да присуствува на пресот, но три часа бил задржан во полиција.

„Сигурно нема лоши намери, се работи на истражните мерки“, нагласи Таравари.

Одговарајќи на новинарски прашања, Таравари нагласи дека се разгледува коритото по течението на реката Вардар, се вршат анализи барајќи најсодветено решение за подигање на безбедноста. Градоначалникот ја поздрави изјавата на премиерот Зоран Заев во која се најавија измени на актуелните закони, бидејќи се премногу комплицирани, а премиерот најави и нова регулатива за функционирањето на шелтер центрите.