Претставена програмата и младенците на Галичка свадба 2021

Галичник викендов ќе биде домаќин на традиционалната и наделеку позната манифестација Галичка свадба. Програмата, како и овогодинешните младенци Катерина Илиевска и Филип Бундески официјално беа претставени денес на прес конференција.

„Чест ми е што сум галичка невеста, што сум дел од оваа традиција. Галичката свадба е една од најавтентичните на Балканот и пошироко, ќе ги испочитуваме нашите предци и нашата традиција и сигурно убаво ќе си поминеме сите викендов во Галичник“, реше невестата Катерина.

Зетот Филип има галичко потекло и на манифестацијата до сега учествувал повеќепати во разни улоги.

„Чувството е неопислвио да се биде дел од оваа богата традиција, одговорноста е голема, да се испочитува се она што ни го оставиле нашите предци. Повеќе години сум учествувал во различни улоги, како статист, коњаник, а една година и стар побратим и се‘ повеќе се гледав како зет на Галичка свадба. Кога работите меѓу мене и Катерина станаа сериозни, видов дека и таа има желба да биде галичка невеста и се согласивме дека ова мора да го направиме.“, рече младоженецот.

Среќа на младенците им посака министерката за култура Ирена Стефоска, која нагласи дека Министерството останува силен поддржувач и промотор на Галичката свадба. Манифестацијата започнува во петок навечер (16 јули) со концерт на групата „Љубојна“ на платото пред чешмата Упија, а настап ќе имаат и групите „Тоа е тоа“ и „БендОфф“.

За време на викендов во Галичник ќе има посебен режим на сообраќај и правила за одлагање на отпадот.