Претставени предлог-новините во основното образование: Помалку часови, без работни саботи, напредни наставни планови за талентираните ученици …

Ќе се скрати времето кое основците го поминуваат во училиште, ќе се намали бројот на ученици во паралелките, ќе се укинат работните саботи, наставниците ќе имаат платени неработни денови за време зимскиот распуст, а училиштата ќе бидат обврзани да спроведуваат Програми за заштита од насилство и дискриминација. Ова се дел од предложените измени во новиот предлог-Закон за основно образование, кој денес пред јавноста го претстави министерката Рената Дескоска.

„Бројот на наставни денови нема да биде фиксно утврден, со цел да се избегне одработување на часови во саботите за кои искуството покажува дека не се ефективни денови за настава. Најмалку половина од траењето на зимскиот распуст на учениците за наставниците, ќе бидат платени неработни денови. Со законот ќе се утврдува максималниот број на часови на учениците и тоа за учениците од 1 до 3 одделение најмногу до 20 наставни часа неделно, од 4 до 6 одделение најмногу до 25 часа, од 7 до 9 најмногу до 30 наставни часа неделно“, нагласи Дескоска.

Основните училиштата ќе имаат обврска да спроведуваат Програма за заштита од насилство и  дискриминација и во таа насока родителите на учениците кои ќе користат говор на омраза ќе посетуваат посебно советување. За талентираните ученици е предвидена можност за развој и успеси по специјален напреден образовен план скроен според нивните способности.

Министерството ќе прима забелешки, коментари и мислења за предлог-законот во рок од еден месец. Новиот Закон најверојатно ќе биде донесен пред септември, односно пред почетокот на следната учебна година.