Превезуваат патници без лиценци, контроли во јавниот превоз во Гостивар

Вчера (13 октомври) од 10 до 13 часот, на регионалниот пат Гостивар-Чегране, во село Чајле, полициски службеници на СВР Тетово-Одделение за безбедност на патниот сообраќај Гостивар спровеле засилени сообраќајни контроли на возила кои вршат јавен превоз без потребните лиценци.

Во овие активности, реализирани во координација со Надворешна канцеларија за криминалистички работи Гостивар, откриени и законски санкционирани се 3 возила (комбиња), против чии сопственици ќе бидат изготвени соодветни поднесоци, согласно член 284 А од Кривичниот законик.

Вакви активности на 3-ти и 9-ти овој месец беа спроведени на регионалниот пат Гостивар-Гредец и на гостиварските улици „Беличица“ и „Балиндолска“, при што беа санкционирани вкупно 11 возила без лиценци, од кои 6 биле патнички, а 5 комбиња.