Презентација на најпознатиот специјалитет на Гостивар – баклава

Во Ресурсниот центар I Can во Гостивар се организираше отворен ден, на кој неколку гостиварски компании ги презентираа своите баклави. Честа и задоволството да го вкусат  најпознатото гостиварско благо, имаа претставници од училиштата и институции.

Настанот, на кој присуствуваше и  градоначалникот Арбен Таравари, се одржа во дворот на центарот, како еден вид неформално дружење и презентација на баклави, карактеристичен специјалитет за Гостивар.

„Нашиот центар како главна цел има креирање на еко систем за соработка меѓу бизнис заедницата образованите институции и невработените. Имајќи предвид дека сега беше големиот муслимански празник Бајрам, организираме денес баклава парти. Тука се претставници на училиштата, компании кои произведуваат баклави и институциите од конзорциумот на I Can. Гостивар е познат по квалитетот на баклави, па идејата е тие компании кои ги произведуваат да можат да ги претстават во јавноста, и на тој начин можеби и да се прошири тој бизнис и надвор од Гостивар“, рече Азир Алиу, проект менаџер на центарот

Младинскиот Ресурсен центар ICan во Гостивар беше отворен во февруари годинава, а функционира како место за бесплатни обуки и едукации за младите кои треба да им помогнат во вработување и самовработување.

Наменет е за млади невработени до 29 години, ученици, и бизнис секторот од целиот полошки регион.