Дебрешанка пријавила грабнување од лице со кое се запознала преку Инстаграм

Осумнаесетгодишна жителка на гостиварско Дебреше, вчера пријавила противправно лишување од слобода, а осомничен дека го извршил е 20-годишник од тетовското село Пирок, информира СВР Тетово.

Според нејзиното кажување, со лицето се запознале пред повеќе од два месеци преку социјалната мрежа „Инстаграм“ и на 6-ти минатиот месец се сретнале во фризерски салон во Гостивар, од каде наводно насилно ја внесол во неговото возило и заканувајќи и се дека ќе и го убие сопругот и други членови на семејството и го одзел мобилниот телефон и ја однел во неговата куќа во Пирок.

Додека била во куќата, наводно не и бил дозволен никаков контакт, но вчера околу 16 часот и 30 минути таа успеала да им се јави на родителите и побарала да дојдат да ја земат.

Од полицијата соопштуваат дека сите инволвирани биле повикани во СВР Тетово, разговарано е со нив и се работи на целосно расчистување на случајот.