Пристигнуваат печалбарите: Гужви низ гостиварските улици

Летните месеци, јули и август се најкритични од гледна точка на сообраќајната безбедност во Гостивар. Со доаѓањето на времено вработените во странство, кои традиционално дел од летниот одмор го поминуваат во родното место, се зголемува фреквенцијата на возила по патиштата и улиците. Навиките задолжително да се прошета со автомобил низ градот, создаваат гужви во текот на целиот ден, а уште повеќе во вечерните часови.

Податоците потврдуваат дека најголемиот број на сообраќајни несреќи се случуваат во летниот период. Во еден ден се регистрираат по неколку несреќи, а значителен дел од нив завршуваат и со сериозни последици. Во функција на воспоставување поголем сообраќаен ред и безбедност на подрачјето, Секторот за внатрешни работи Тетово излезе со  апел до возачите целосно да ги почитуваат сообраќајните правила и прописи. „Да ја прилагодат брзината според условите на патот, да не седнуваат зад волан без положен возачки испит, под дејство на алкохол, изморени и без претходно да ја проверат техничката исправност, но и да водат сметка кога и каде ги паркираат возилата. Ова, подеднакво се однесува и на домашните возачи и на печалбарите кои  во најголем број управуваат брзи возила, а поединци не ретко не ги почитуваат постоечките знаци за ограничување на брзината.“, апелира полицијата.

Во текот на летото на поширокото гостиварско подрачје ќе има засилени сообраќајни контроли.