Продолжува Лигата на Нации: Естонија-Македонија денеска од 18 часот

Фудбалската селекција на Македонија денеска од 18 часот ги продолжува настапите во новото издание на Лигата на нации во лигата Ц. Во Талин нашата репрезентација ќе се сретне со Естонија.

Македонските репрезентативци ќе се обидат да ја забележат втората победа во групата, во која се на чело по 2 меча и 4 освоени бода, во нашата група уште се Грузија и Ерменија.

Селекторот на македонската А репрезентација, Игор Ангеловски и репрезентативецот Иван Тричковски на официјалната прес-конференција спроти утрешниот натпревар против Естонија во Талин ги споделија своите очекувања за натпреварот од третиот круг од групата Ц во Лига на нации.

– Се подготвуваме како и за секој друг натпревар. Мечот против Косово веќе е зад нас и целосно сме фокусираме на овој натпревар. Стартувавме добро во групата од Лига на нации и нашата цел е освојување на трите бода на утрешниот дуел. Квалитетот на моите фудбалери ми дава право да верувам дека ќе успееме, навистина сум среќен што работам со оваа група на фудбалери кои на секој следен натпревар ја потврдува својата вредност. Сите се ставаат во функција на тимот и на тој начин ги покриваме и проблемите кои ги имаме со повредени фудбалери. Го почитуваме противникот, имаат добри фудбалери, Туњов од Спал, Васиљев од Флора и треба да бидеме максимално внимателни, изјави селекторот Ангеловски.

Репрезентациите на Македонија и Естонија досега се сретнале три пати, нашата селекција нема пораз во меѓусебните дуели, во денешниот натпревар влегува со скор од 2 победи и 1 нерешен резултат против Естонија.

ФФМ пред денешниот натпревар јавува за несакана ситуација во Талин, тројца членови на македонската експедицја во Естонија се позитивни на Ковид-19.

„Тројца членови од македонската А репрезентација, еден фудбалер, член на стручниот штаб и лице од техничката служба, денеска добија “претпоставени позитивни резултати” (означен назив на тестовите) на последното тестирање за присуство на вирусот Ковид-19, извршено по пристигнувањето на нашата репрезентација во Талин за натпреварот меѓу Естонија и Македонија од Лига на нации. Сите членови на македонската селекција, пред почетокот на подготовките за натпреварот со Косово, пред самиот натпревар со Косово и еден ден после мечот со Косово, односно пред заминување за Талин, добија негативни резултати од тестирањата направени во овластена лабораторија на УЕФА. Веднаш побарано дополнително тестирање за тројцата членови на репрезентацијата, но за жал, во овој момент, тројцата мора да бидат изолирани во хотел, а фудбалерот нема да може да биде во комбинација за настап на вечерашниот натпревар“, велат од ФФМ.