Продолжува намалувањето на бројот на дечиња во училиштата во Гостивар

Пред почетокот на секоја учебна година се актуелизира прашањето за намалување на бројот на деца во гостиварските училишта. Сѐ повеќе школски клупи зјаат празни, а во паралелките има се‘ помалку ученици.

Нормата на законски минимум за формирање паралелки во најголем дел од училиштата е недостижна, поради што се потегнуваат правните механизми за функционирање. Општинскиот Совет дава согласност да се формираат паралелки во училиштата со помалку од 24 ученици. Ваква одлука, во пресрет на новата учебна година се донесе и на денешната седница на гостиварскиот Совет.

„Бележиме постојан пад на бројот на ученици, а потребно е да се формираат паралелеките. Барања за паралелки со помалку од 24 деца имаме од училиштата, како во градот, така и во селата.“, рекоа од Секторот за образование.

Одлуката беше изгласана, но пред тоа се разви дебата во насока на тоа дали се почитува реонизација при упис на ученици, колку тоа се контролира, за потребата од деневен престој во школите во селата и слично.

Од Секторот за образование истакнаа дека изминатиот период бил одржам состанок со директорите на сите училишта, била нагласена потребата од почитување на реонизацијата и најавија контроли за тоа.

Намалениот број на ученици пред сѐ се должи на масовното иселување, а и на одложување на мајчинството и тековите на формирање семејства со едно до најмногу две дечиња.

Актуелните податоци за бројката на ученици за новата учебна година се очекува да бидат познати во понеделник, кога по летниот распуст ќе заѕвони училишното ѕвонче.