Продолжува рекордниот раст на рубљата во однос на доларот и еврото

И покрај најголемите санкции во историјата наметнати од Запад против Русија, рубљата продолжува да зајакнува во однос на доларот и еврото.

Рубљата денеска продолжи да расте во однос на доларот на Московската берза, при што американската валута падна под нивото од 58 рубљи за прв пат од април 2018 година. Во тргувањето во 7:33 часот по средноевропско време, рубљата зајакна за повеќе од 3,0 отсто, пренесува Ројтерс.

Курсот на еврото пак падна под 60 рубљи, првпат од април 2017 година, соопшти Московската берза.

Рубљата зајакна повеќе од 24 отсто од почетокот на годината и покрај економската криза, со што стана најуспешната валута во светот во однос на перформансите на пазарот, поддржана од контролата на капиталот воведена од Русија кон крајот на февруари за да го заштити својот финансиски сектор по специјалната војска операција во Украина.