Продолжуваат кошаркарските возбудувања – КК Гостивар денеска му гостува на МЗТ Скопје

Првопласираната екипа на табелата МЗТ Скопје и второпласираниот КК Гостивар, вечерва  ќе го отворат вториот дел од сезоната 2019/2020 во Првата македонска кошаркарска лига.

„Бело-сините“ му гостуваат на актуелниот шампион, кој поради учеството во АБА2 побара натпреварот да се одигра на петок. Ова ќе биде прв натпревар за избраниците на Србиноски после паузата и во новата 2020 година, додека МЗТ Скопје е во полн натпреварувачки ритам. Во првиот меѓусебен дуел гостиварци беа поуспешни во Младост совладувајќи ги „аеродромци“ со резултат 80-78.

Што се однесува до играчкиот кадар нема големи промени во ростерите кај двете екипи, КК Гостивар се раздели со Арсеније Вучковиќ, неговото место се очекува да го пополни странски играч. Кај МЗТ Скопје нема официјални промени. Избраниците на Кочов во досегашниот дел од првенството имаат скор од 9 победи и 2 порази, додека гостиварци имаат 8 победи и 3 порази.

Дербито на 12-тото коло се игра од 20.15 часот во СЦ Јане Сандански во Скопје. МРТВ ќе врши директен пренос на натпреварот.