Продолжуваат уписите во средните училишта

Полуматурантите кои не се запишаа во средно во првото пријавување, денес и утре (24 и 25 јуни) повторно имаат можност за упис. Се спроведува второто пријавување во јунскиот уписен рок за 2019/2020 година.

Во сите јавни средни училишта во Гостивар има слободни места за прием на ученици. Бодовниот минимум се движи од 30 до 70, а според конкурсот за упис во средно, училиштата по првото пријавување, можат да го намалат утврдениот број на минимум поени најмногу до 10 поени, освен за гимназиско образование, економско – правна и трговска струка и здравствена струка.

При пријавувањето, учениците поднесуваат: пријава која е бесплатна и се подигнува од училиштето во кое се конкурира, оригинални свидетелства од VI до IX одделение, извод од матичната книга на родените и доколку ученикот има освоено награди од меѓународни и државни натпревари ги доставува дипломите.