Професори и ученици од средното медицинско на обуки во Шпанија и Бугарија

 Средното медицинско училиште во Гостивар влезе во значаен проект од Еразмус програмата, поддржана од Европската Унија. Дваесетина професори и 40 средношколци од ова училиште ќе посетуваат обуки во Шпанија и Бугарија да ги усовршат своите знаења и да ги согледаат европските трендови во медицинската област. Дел од нив ќе заминат во првото, а дел во второто полугодие. За своето учество во проектот професорите и учениците ќе добијат меѓународно признати сертификати.

Од училишната управа сметаат дека обуките ќе бидат од голема корист за наставниот кадар, а учениците ќе се мотивираат да бидат што подобри во знаењето со оглед на тоа што во проектот ќе се вклучат средношколците со најдобар успех. Во Шпанија ќе престојуваат по седум дена, додека во Бугарија е предвиден престој од три недели и пракса на Универзитетските клиники.

За спроведување на активностите од Еразмус програмата, гостиварското медицинско училиште ќе добие 135 илјади евра обезбедени од европските фондови.