Промени на директорските места во неколку училишта на подрачјето на Гостивар

Откако второстепената комисија ги укина именувањата на директори во повеќе училишта на подрачјето на општина Гостивар, кои беа направени од градоначалникот Арбен Таравари, Министерството за образование ќе ги врати претходните директори или ќе постави вршители на должност.

– Со спроведувањето на решението од второстепената комисија работите се враќаат во претходната состојба. Таму каде што ќе биде утврдено дека на директорите им истекол мандатот, ќе бидат назначени вршители на должноста, информираат од Министерството.

Градоначалникот на Гостивар вели дека оваа одлука исто како и одземањето на надлежностите има политички мотиви.

„Ова назначување на директори ми личи на времето на Милошевиќ кога во Косово ги назначуваше тие Албанци кои се прикладни за власта, па така и Заев со министерот за образование одлучија во Гостивар насилно да назначуваат Албанци кои се прикладни за власта“, изјави Таравари.

Министерството за образование пред еден месец му ги одзеде надлежностите на градоначалникот за именување и разрешување на директори на општински основни и средни училишта. Во решението за одземање на надлежностите стои дека Таравари ги прекршил законите за основно и средно образование и не постапил по укажувањата на инспекциските служби за отстранување на неправилностите. Таму се наведени средните училишта: гимназија, медицина и техничко и основните во селата Дебреше, Србиново, Форино и Вруток и ОУ „Исмаил Ќемали“ во градот.