Променливото време ризик: Над 100 пациенти на Итна помош во Гостивар за 24 часа

Медицинарите периодов имаат полни раце работа. Променливите временски услови со продолжени дождливи денови какви што беа претходните јунски и наглите температурни разлики носат ризици по здравјето на граѓаните. Во службата за Итна медицинска помош при Здравствениот дом во Гостивар, во едно деноноќие за лекарска помош се обраќаат по повеќе од сто пациенти. Маките им се различни: од отежнато дишење и висока температура до тешкотии поради покачен притисок.

„Променливото време е ризик за здравјето и сите граѓани треба да си обрнат поголемо внимание. Особено тие со хронични болести. Децата се најчесто со висока температура, но последните денови има и со дијареја и повраќање. Таквите вирози кои даваат стомачни тегоби се очекувани во летниот период. Алергиите исто така, се актуелни периодов, а тие се манифестираат со отежнато дишење, ниска сатурација и слични проблеми со респираторниот систем.“, вели докторката од Итна помош, Анифе Ејупи Мифтари.

Искуството на здравствените служби покажува дека пациентите кои се ставени на редовна терапија поради зголемен крвен приситок, честопати не ја земаат, па ноќе со тегоби завршуваат на инекција на Итната помош.

„Имаме доста возрасни пациенти кои доаѓаат за помош со многу покачен крвен притисок. И тоа, многу од нив имаат препишана редовна терапија од специјалист, но не ја земаат. Некои забораваат, некои велат немале пари да ги набават апчињата, ако се од тие што одат на приватно“, вели докторката нагласувајќи дека е исклучително важно хронично болните да ја примаат својата терапија за да не доаѓа до компликации.

Како превентива за зачувување на здравјето се препорачува полесна и здрава храна, избегнување на обилни оброци и брза храна, како и физичка активност според можностите и кондицијата.

Во летниот период кога настапуваат екстремно високите температурите, лекарите очекуваат уште поголема бројка на пациенти кои се обраќаат за брза помош, која вообичаено се движи од 150 до 170 во деноноќие.