Промотивен настан на плоштадот во Гостивар за важноста на вакцинацијата

На градскиот плоштад во Гостивар денеска беше организиран промотивен настан посветен на важноста од имунизација и редовното вакцинирање. Настанот го организираше гостиварскиот Здравствен дом, во соработка со Црвениот крст, а во рамки на Европската недела на имунизација.

Беше поставен штанд на кој медицински лица и волонтери на граѓаните им делеа брошури со едукативна содржина и ги запознаваа со придобивките од имунизацијата.

„Имунизацијата е еден од најголемите успеси во историјата на медицината и една од најзначајните здравствени инвестиции во здравството. Вакцинацијата претставува единствената превентивна мерка која е достапна за болести за кои не постои познат лек. Освен то, вакцинацијата против бактериски инфекции служи како средство за намалување на зависноста од антибиотици и за ублажување на појавата на антибактериска резистенција.“, се наведува меѓу другото во брошурата што беше поделена.

Оваа година Европската недела на имунизација се одбележува под мотото „Имунизацијата придобивка за сите“.