Промоција на збирката детски песни „Стихувалки“ во Гостивар

Поетскиот карван „Стихувалки 2018“ во сабота (15 септември) ќе го посети Гостивар. Промоцијата на збирката творби со детски песни од 49 автори од различни градови во Македонија, избрани по пат на конкурс, ќе се одржи во малата сала на Центарот за култура „АСНОМ“ со почеток во 12 часот. Гостиварката Слаѓана Брезовска е меѓу застапените поети во книгата, кои претендираат за награда.

„Не очекува многу интересен и невообичаен настан, преку кој се прави обид да им се доближи поезијата на дечињата, да ги поттикнеме да читаат, па и самите да творат. Затоа, ги поканувам децата, родителите, учителките да дојдат и да бидат дел од ова убаво поетско дружење во кое верувам дека ќе уживаат сите.“, вели Брезовска.

Промоции на збирката „Стихувалки“, освен во Гостивар се одржуваат во Битола, Охрид, Велес, Штип, Кочани, Прилеп и Скопје. Промотори се проф. д-р Кристина Николовска, проф. д-р Христо Петрески и м-р Ели Маказлиева. Проектот го реализира издавачката куќа Едука Мак, со поддршка на Министерство за култура на Република Македонија.