Промовирана стихозбирката на Слаѓана Брезовска

Викендов што измина (22.10.2016) во кафе пицеријата „ПИЈАНО ” во нашиот град се промовираше наградената стихозбирка на нашата сограѓанка Брезовска.

ГП: Поминаа само неколку дена од промовирањето на  втората поетска книга насловена како „Бесмртно”, какви се вашите впечатоци?

Брезовска: Пред се’ би сакала да  се заблагодарам  на вашата екипа  која будно ги следи случувањата од сите области  во нашиот град и навремено ги информира гостиварци за актуелностите, на Гостивар му недостигаше информативен медиум како што сте вие.

Промоцијата се реализира според моите замисли и тоа ме прави дополнително среќна!

На едно место успеав да ги соберам  почитувачите  на поезијата,на убавото,на радоста за прославувањето на животот. За еден автор нема поголема радост од присутноста, укажаното внимание и читаноста! Присуството на околу шеесетина сродни души  од кои дваесетина не беа мои сограѓани го дишевме истиот воздух таа вечер, беше магично.

Голема  е бројката на луѓето кои  од најразлични причини не успеаа да присуствуваат  на мојата двојна прослава  и  со тоа дополнително ќе ми се продолжи среќата, прославувањето и дружбата.

Овој 22-ри Октомври ми беше и ќе остане незаборавен ден додека дишам. Од секој можен аспект сум исполнета и среќна!Впрочем тоа е и смислата на животот и  секој од нас треба да си го дозволи (барем како еден ден), задоволство(то).

ГП: Ќе ни откриете ли  нешто малку повеќе за содржината на  вашата стихозбирка ?

Брезовска: Содржината во „Бесмртно” е едноставна животна комплексност, истовремено е  и тивко и силно пеење за животот/љубовта, каде се разбира, неизоставен дел е (мојот) женскиот поглед на тоа.

На промоцијата издавачот на книгата, г-ѓа Десанка Николова во обраќањето пред присутните рече: „Бесмртно во кодот на женското писмо е лекција за животот и љубовта,поставувајќи ги и истовремено одговарајќи ги егзистенцијалните прашања “. Оние кои веќе ја имаат стихозбирката верувам дека во многу мои пеења веќе се имаат доживеано себеси. Без разлика дали читателот е  од спротивен пол на мојот, ќе се пронајде, ќе егзистира, ќе трансцендира  со душата во некоја од моите песни.

На последните страници од  „Бесмртно” г-динот Тони Науновски  многу мудро и поетски  ги има дефинирано моите пеења во делот каде вели: „ Во бесконечниот круг, симбиозата без почеток и крај наречен бесмртно, ние го засновуваме животот, оној најдобриот, исполнет со чисти појави, без наносите од секојдневието кое е конечно. Во „Бесмртно“ на Слаѓана Брезовска ни е покажано како можеме да бидеме – бесмртни!  ”

Искрено  се надевам дека ќе допрам длабоко до секоја душа која ќе ја чита мојата стихозбирка.

ГП: За крај тие кои се уште ја немаат стихозбирката каде би можеле да ја купат?

Брезовска: Засега останува на тоа лично да ме контактираат со што би добиле и посвета. Ви посакувам голема читаност.