Проработе мерната станица во Гостивар – Загадувањето трипати над дозволеното!

Мерната станица за квалитет на воздухот во Гостивар, од денес повторно го покажува нивото на загадување со штетни ПМ10 честички.

Министерството за животна средина и просторно планирање информираше дека по спроведена отворена постапка за доделување на договор за јавна набавка на 5 автоматски анализатори за мерење на суспендирани честички PM10 и на 5 системи за прибирање и обработка на податоци, во автоматските мониторинг станици за квалитет на амбиентен воздух Лисиче, Гостивар, Кичево, Велес 2 и Кавадарци инсталирани се нови мерни инструменти и истите се ставени во работен режим. Податоците од извршените мерења, од денеска се достапни за јавноста на веб порталот за квалитет на амбиентниот воздух: air.moepp.gov.mk.

Gostivarpress.mk пред неколку дена алармираше дека мерната станица, којашто е лоцирана во дворот на основното училиште „Гоце Делчев“ со месеци не го покажува аерозагадувањето.

Последните мерења од 17 часот покажуваат 162 микрограми на метар кубен, што е три пати над дозволената граница.