Празнување на Балаклија во црквата Света Петка во Гостивар

Православните верници денес го слават празникот Источен Петок-Балаклија, посветен на Мајката божја и нејзините чуда. За верниците од Гостивар и гостиварско, традиционално централното одбележување на празникот се одвива во црквата Света Петка, каде утрово, беше отслужена света архиерејска литургија. Потоа беше извршен чин на осветување на водата, од која граѓаните земаа за здравје. Според обичаите на овој празник, верниците во црквата носат и даруваат велигденски јајца.

Источен Петок-Балаклија е првиот ден петок по празникот Велигден. Спаѓа во Светлата недела и со него се оддава признание на Пресвета Богородица, поради тоа што непосредно по Велигден нема друг празник поврзан со нејзиното име. На овој ден се празнува обновувањето на храмот на Богородица во Цариград, наречен Живоносен Извор, поради чудотворниот извор со вода што се наоѓа во него. Поради тоа што Богородица му ги миела раните на Исус, на овој ден луѓето ги посетуваат изворите и ги мијат лицето и очите, или три пати преку себе префрлаат вода од изворите.