Прослава на празникот света Екатерина во манастирот со нејзино име во Стенче

Денешниот православен празник света Екатерина беше прославен во манастирот во село Стенче кој го носи името на оваа светица.

При тоа, митрополитот Тетовско-гостиварски г.Јосиф ги благослови кумските лебови. Пред присутните верници и кумовите митрополитот г.Јосиф истакна:

„Денес сме браќа и сестри овде во прекрасното и живописно село Стенче каде во 2022 го осветивме овој велелепен храм посветен на денешната светителка маченичка св.Екатерина. Тогаш на осветувањето на храмот во мојата беседа нагласив дека овој храм е дом Господов, дом за молитва и како таков преставува „парче небо на земјата“ во кое сите ние „оскребени и обременети“ од животните грижи наоѓаме спокој и мир. Со влегувањето во него и со молитва кон светaта Екатерина патронот на овој храм, повторно и секогаш ќе ја враќаме утехата, верата, надежта и љубовта во нашите срца. Женскиот свет, подобен на жените мироносици, продолжува да се пројавува низ целата историја на христијанството. Особено се покажале храбри за време на гонењето на христијаните. Мачениците се луѓе што пострадале, односно биле убиени само затоа што верувале во Господ Исус Христос и не сакале да го променат она што станало дел од нивното битие, зашто знаеле, живееле и чувствувале дека тоа е вистинското, зашто гарант за тоа е Оној Кој е Патот, Вистината и Животот. Нека храброста на св.вмч Екатерина постојано пребива во нашите мисли, посебно во овие празнични денови, и таа храброст постојано нека ја јакне нашата вера, за да можеме да издржуваме во сите искушенија и несреќи кои навалуваат на нас. Храброста на света Екатерина нека ни биде вечна лекција дека немаме ништо поскапоцено и повредно од името на нашиот Спасител, Господ Исус Христос.Амин.“