Прослава на Успение на Пресвета Богородица во Лешочкиот манастир

Големиот христијански празник Успението на Пресвета Богородица (Голема Богородица) традиционално, свечено и торжествено се прославува во Лешочкиот манастир.

Одбележувањето започна со празнична Вечерна богослужба, на која чиноначалствуваше митрополитот Тетовско-гостиварски г.Јосиф во сослужение  на протоереј Маријанчо Мадевски, ереј Илија Сламков, ереј Велјанчо Огненовски и ѓакон Илија Деспотовски.

По завршувањето на Вечерната служба, беше изнесена за целивање плаштаницата на Успението на Пресвета Богородица, над која се пееја статиите од опелото на Пресвета Богородица, а верниот народ се поклони и оддаде почит на Богомајката.

По вечерната богослужба надлежниот митрополит г Јосиф се обрати со пригодна беседа говорејки дека денеска севкупниот свет е исполнет со пофалба кон неа, Пресветата Богородица: „На нејзиното славно успение сè се радува. Се радува видливиот, се радува и невидливиот свет. Се радува разумното, се радува и неразумното.Должни сме секогаш да паметиме дека, за застапничка и молитвеничка, пред нашиот Творец и Спасител, ја имаме Пресветата Богородица.“

извор:тетовско-гостиварска епархија