Прославен Денот на ослободувањето на Гостивар

Со свечена манифестација, доделување на признанија и културно-уметничка програма во Гостивар беше прославен 18-ти Ноември, Денот на ослободувањето на градот. На настанот кој го организираше Општинскиот одбор на сојузот на борци и основното училиште „Единство“ присуствуваа голем број граѓани, ученици, претставници на политички партии и гости од тетовската касарна, Сојузот на борци од Тетово, здружението на пензионери и други.

По повод 73 години од конечното ослободување на Гостивар, професорката по историја во ОУ „Единство“ Катица Аврамоска прочита реферат со акцент на историските текови врзани со последните ослободителни акции од НОБ и пожртвуваноста на борците.

„Тој 18 Ноември 1944 година, не го доживејаа 323 активни учесници и 158 граѓани жртви на фашистичкиот терор, Македонци, Албанци, Турци, Роми и други. Тие со својат крв грантино го цементираа темелот на денешната слобода и ним им должиме голема слава“, нагласи Аврамоска.

Манифестацијата за Денот на ослободувањето ја збогатија основците од училиштето „Единство“ кои љубовта и почитта кон родниот град ја искажаа преку пишаниот збор, рецитации и пеење.

На свеченоста, според традицијата на поединци и фирми кои ги поддржуваат активностите на боречката организација им беа доделени признанија. Исто така, беа доделени и наградите од литературниот конкурс за најдобар ученички есеј на тема „Слободата е нашата сегашност и патоказ за посветла и посреќна иднина на сите нас“

Одбележувањето заврши со положување на букети цвеќе на споменикот на паднатите борци од НОБ.