Протестен марш во Скопје на семејствата на загинатите во пожарот во Кочани

Маршот на семејствата на настраданите во трагичниот пожар во дискотеката „Пулс“ во Кочани започна денеска точно во 12:05 часот, како симболика за, како што нагласија, задоцнетата реакција на институциите.

Протестната поворка започна пред зградата на Јавното обвинителство во Скопје, каде што семејствата побараа оставки од сите одговорни за несреќата и формирање на експертска влада. Од нивно име, Владимир Апостолов порача дека за трагедијата се виновни сите досегашни владејачки структури.

Дел од семејствата влегоа во Обвинителството, каде што вчера добија покана за средба со државниот јавен обвинител и со надлежните обвинители кои го водат случајот.

По протестот пред Обвинителството, семејствата се упатија кон Собранието, каде што се одвиваше расправа за интерпелацијата на министерот за внатрешни работи, Панче Тошковски. Таму тие повторно повикаа на одговорност и добија поддршка од пратеници на Левица, СДСМ, како и од лидерот на опозицијата, Венко Филипче. Пратеникот Никола Мицевски информираше дека министерот Тошковски ќе ги прими на средба.

Средбата со министерот Тошковски се одржа во Министерството за внатрешни работи. Тошковски пред семејствата истакна дека правдата мора да биде задоволена доколку сакаме да изградиме нормална држава. Тој додаде дека не може да открие повеќе детали поради интересот на истрагата, но информираше дека досега 70 лица се осомничени, меѓу кои и актуелен министер, директор на Дирекцијата за заштита и спасување, како и актуелен градоначалник.