Противпожарна во Гостивар доби возило за интервенции на висина

Противпожарната единица во Гостивар се поднови со специјално возило за интервенции на висина. Камионот за гаснење пожари со ескалатор висок 28 метри, е обезбеден преку донација од хуманитарната организација Hasene, а денес во кругот на пожарната беше извршено официјалното примопредавање, на кое присуствуваше градоначалникот Арбен Таравари.

„Посебна чест ни е што од невладината организација Hasene како донација добиваме камион за Противпожарната единица за интервенции на висина, нешто што токму недостасуваше во единицата. Се надевам дека што помалку ќе се користи, а кога ќе биде неопходно дека ќе даде добри резултати.“, рече градоначалникот.

Претставниците на организацијата Екрем Билали и Хајул Имери истакнаа дека им е драго што со оваа донација се дава помош за Противпожарната единица, којашто е една од најважните и елементарна за граѓаните.

Според најавите, до крајот на годината, за потребите на гостиварските пожарникари ќе биде обезбедено уште едно специјално возило.