Проверете го броилото да се осигурате дали имате дневна евтина струја

Почнувајќи од денеска во периодот од 13 до 15 часот повторно се активира евтина дневна тарифа на струјата. Регулаторната комисија за енергетика, водни услуги и услуги за управување со комунален отпад (РКЕ) во декември 2021 година ја укина евтината дневна тарифа за домаќинствата заради цената на електричната енергија на берзите која се движеше од 300 до 400 евра за мегават час, а во текот на денот достигнуваше и до 500 и 600 евра па и повеќе.

„Со воведување на дневната евтина тарифа домаќинствата ќе имаат на располагање вкупно 11 часа евтина електрична енергија во текот на едно деноноќие од понеделник до сабота и 24 часа во недела. РКЕ по направените анализи оцени дека се создадени услови домаќинствата да користат дополнителни часови во коишто надоместокот за потрошената електрична енергија ќе се пресметува по евтина тарифа. Податоците укажуваат дека инвестицискиот циклусот во обновливи извори на енергија го зголеми производството на електрична енергија со што директно се влијаеше врз намалување на цената преку ден“, изјави претседателот на РКЕ Марко Бислимоски.

Според него, денеска евтина дневна тарифа ќе добијат сите потрошувачи кои имаат броила што се читаат од далечина, а до крајот на месецов околу 90 проценти од домаќинствата. Кај оние кои немаат броила на далечина, вработените на ЕВН ќе ги сетираат рачно. Проблем ќе бидат домаќинствата кај кои се недостапни броилата.

За да се осигурате дали имате евтината тарифа, треба да проверите дали на екранот на броилото во 13 часот ќе се појави ознаката за ниска тарифа Т2.