Првачињата во Гостивар учат за сообраќајна сигнализација, движење по улица…

Привршуваат активностите во рамките на превентивно-едукативниот проект „Поголема безбедност на децата до домот“, кој започна во текот на минатиот месец на поширокото гостиварско подрачје.                                                                  Со овој проект чиј носител е Отсекот за превенција на СВР Тетово, а се спроведува и во тетовско, досега се опфатени 17 основни училишта на подрачјето со над 360 првооделенци, кои следат настава на македонски, албански и турски јазик. На најмладите основци, на посебни часови, полициски службеници, теоретски и практично, им објаснуваат што е сообраќајна сигнализација, како да преминат улица, каде да се движат по улици или патишта на кои нема обликувани тротоари и друго.

Целта на предавањата е децата од најмала возраст да се стекнат со најосновните знаења, да изградат сообраќајна свест и култура, за да можат непречено и безбедно да стигнуваат до училиштата и назад кон нивните домови. Планираните активности се очекува да завршат до крајот на идната недела, со што целосно ќе се заокружи проектот.