Психологот Карахасан: Коронакризата е порака да се свртиме кон духовните вредности – Џабе сите пари, ако имаме разводи и семејно насилство

Ковид пандемијата донесе најразлични премрежја во животите на луѓето. Борбата не е само на оние кои се борат дирекно со болеста, туку скоро на сите. За голем дел бојното поле е обезбедувањето на егзистенција, како и одржување на менталното здравје.

Во услови на криза, под стрес и во страв од заразување, човековата психа попушта. Се нарушуваат односите во семејството, расте нетрпението и се занишуваат темелите на најважната клетка на општеството, оценуваат психолозите.

„Сигурно дека цела ситуација со ковид 19 не влијаеше позитивно. Како прво имаме пораст на депресивни болести, а со тоа пораст на семејно насилство, на незадоволство, а на крајот на краиштата и на разводи. Генерално, тоа што е тренд не само кај нас, туку и во светот е дека коронакризата влијае врз психичкото здравје. Дојде летото, се надевавме дека ќе се подобри ситуацијата, но не е така, неизвесноста е уште поголема. За есента има најави дека ќе се влошува состојбата, можно е пак да има карантини. Сите тие недоумици и нејаснотии, многуте дезинформации негативно влијае на стабилност на луѓето. Да не зборуваме за финансиските проблеми. Следува период на голема економсса криза, последиците ќе бидат уште повидливи. Трендот не е воопшто оптимистички, но јас сепак се надевам дека проблемите ќе се надминат“, вели Билен Карахасан, психолог во Центар за социјална работа Гостивар.

Како да се остане стабилен и присебен во време на коронакриза, кога честопати владее паника, има разни дезинформации и многу неизвесност? Психологот Карахасан советува луѓето да читаат повеќе книги, да посветат внимание на разговор и заеднички активности со своите блиски и да се свртат кон духовните вредности.

„Луѓето треба да се потрудат да ја најдат смислата надвор од материјалниот свет, бидејќи доаѓа време кога нема да имаме пари. Затоа треба да се свртат кон духовните вредности. Родителите на пример треба повеќе време да им обрнуваат на децата, да го собираат семејството, да се разговара, да се споделуваат спомени, заедно да се прави зимница, да се разгледуваат албуми со семејни фотографии и слично. Во оваа криза, треба да се стремиме кон тоа духовно единство. Веројатно ова што се случува со короната во светот е еден вид порака до сите нас, затоа што сме изгубени во материјалниот свет. Џабе сите пари, ако имаме разводи, деликвенција, семејно насилство. Џабе ни се пет телефони, ако немаме хармонија со блиските и мир во душата. Мислам дека доаѓа време на нов духовен препород на тие што ќе размислат и сфатат дека ова е порака да се свртиме кон духовните вредности“, вели психологот.

И Светската здравствена организација предупреди дека на светот му се заканува глобална криза по менталното здравје предизвикана од ковид пандемијата. Како најранливи групи во тој поглед,  СЗО ги посочи децата, младите луѓе, како и здравствените работници поради фактот што се сведоци на голем број на тешки случаи, па и починати од корона вирусот.