Пуштено во употреба реновираното Детско одделение во Гостивар, современи услови за најмалите пациенти

Дечињата пациенти во болницата во Гостивар отсега ќе се лекуваат во современи услови. Симболично, на Светскиот ден на детето 1 јуни, беше пуштено во употреба целосно реновираното педијатриско одделение.

Ова е прва поголема реконструкција на одделението откако е изградено во 1988 година. Со зафатот беа реновирани подот, таванот, водоводот, поставени се комплетна нова инсталација на електричната енергија, нови врати, извршено е уредување на болничките соби, тоалетите и другите простории со вкупна површина од 700 квадратни метри.

„Со помош на донатори се набави мебел, бироа, гардероби, детски кревети, завеси, кујна, телевизор и медицинска опрема. Украсувањето на просториите и ѕидовите со цртежи од детскиот свет го направија учениците од гостиварското техничко училиште, со што се даде поразлична димензија, каде детето пациент нема да има впечаток дека се наоѓа во болница. Овој капитален проект ги исполнува сите услови и современи стандарди и личи на европско одделение“, истакна директорот на болницата, Илбер Адеми.

Инвестицијата е над 14 милиони денари, средства од буџетот на болницата.

Во просек на педијатрија се вршат 800 амбулантски прегледи месечно, односно над 9.000 годишно, додека бројот на хоспитализиразни деца се движи од 600 до 700 во една година.

„Сега со реновирањето на одделението и подобрувањето на условите верувам дека услугата од медицинскиот персонал и лекувањето на болните деца ќе биде поефикасна , додека децата полесно ќе поминуваат во одделението. Освен што пружа медицински услуги за децата од нашиот град, нашето одделение покрива и пациенти од околните села и општини“, рече меѓу другото, раководителот на педијатрија, Висар Муча.

На свеченото отворање свое обраќање имаше и министерот за здравство Фатмир Меџити, но само на албански јазик. Министерот, иако се обрати на јавен настан за проект реализиран од народни пари, не зборуваше на македонски јазик.

На пуштањето во употреба на Детското одделение во болницата „Д-р Ферид Мурад“ во Гостивар присуствуваа и вицепремиерот Артан Груби, директорот на Фондот за здравство Фатон Ахмети и други функционери и личности од политичкиот живот.