Путин: Европа треба да и се заблагодари на Турција

Гасоводот „Турски тек“ работи како и досега без никаков прекин и европските партнери мора да знаат и бидат благодарни на Турција за тоа, изјави рускиот претседател Владимир Путин на почетокот на средбата со турскиот претседател Реџеп Таип Ердоган денеска во Сочи.

„Верувам дека нашите европски партнери ќе мора да и бидат благодарни на Турција за нивната поддршка и непречениот транзит на нашиот гас на европскиот пазар“, рече Путин, а пренесува ТАСС.

Рускиот претседател јавно го пофали и му се заблагодари на Ердоган за напорите што ги направи за да се реши прашањето за испорака на жито од Украина.

На денешниот состанок во план беше потпишување на меморандум за развој на трговско-економските односи меѓу Русија и Турција. Владимир Путин нагласи дека за време на преговорите со турскиот лидер нема да ги игнорира сите прашања што го интересираат за Сирија.

Ова е втора средба меѓу Ердоган и Путин за 17 дена, откако претходно се сретнаа во Техеран, на трилатерална средба со претседателот на Иран Ебрахим Раиси.