Работа од соништата: Плата од 2.000 евра за палење и гасење светло

Шведската влада финансира експериментален уметнички проект, во кој на една среќна личност и се нуди можност до крајот на работниот век да добива по 2.060 евра месечно, за да пали и гаси светло…За што поточно се работи?

„Вработениот“ ќе треба секое утро да оди на железничката станица во Гетеборг и да ја активира својата картичка, по што ќе се вклучат светла на платформата кои ќе означуваат дека овој „важен работник“ дошол на своето работно место.  На крај од својата смена „вработениот“ ќе треба повторно да ја активира картичката, што ќе биде знак дека му завршило работното време. Во меѓувреме, може да прави што сака, да оди кадешто сака, без никакви ограничувања.

Ова работно место е всушност резултат на конкурсот за проекти на Агенцијата за јавна уметност на Шведска, преку кој се барало уникатен дизајн што ќе ја краси новата железничка станица, која треба да се изгради во Гетеборг. Креаторите на дизајнот добиле 667 илјади евра, како победници и решиле парите да ги потрошат на отворање на едно вакво оригинално работно место.

Огласот за пали гаси светло работникот, ќе биде објавен една година пред завршување на изградбата на станицата, која се очекува во 2026 година.