Ракометарите на Јехона се пласираа во плеј-оф фазата од Првата машка лига

Ракометарите на Јехона со вчерашната победата над Партизан од 30:34, обезбедија сигурно место во плеј-оф фазата од Првата машка лига.

Гостите од Гостивар во текот на целиот натпревар беа во водство, водеа со 1:6 во воведниот дел од средбата и со ист ритам продолжија до самиот крај. Победникот веќе беше решен на полувреме кога резултатот беше плус шест гола разлика за екипата на Јехона, 10:16, пишува ракометниот портал Ракомет24.

Во второто полувреме, Живкоски, Марковски, Бошковски и Трајчевски, со своите погодоци го одржуваа водството на својот тим, кое во последниот период од натпреварот беше само три гола разлика, 27:30, но домаќините немаа сила да направат евентуален пресврт.

Најефикасни во победничката екипа беа Стефан Бошковски со осум и Михајло Живкоски со седум погодоци, додека блескав настап на голот имаше Христијан Павлоски, кој собра 15 одбрани.

Во составот на Партизан се истакнаа Горан Лисичков со 11 и Ѓорѓе Банцалиски со девет погодоци.

Во последното коло од регуларниот дел од Првата лига, Јехона на свој терен ќе соочи со Борец од Велес.