Рано е да се укине носењето маски на отворено и да се прават свадби, вели министерот

Доаѓа до олабавување на рестриктивните мерки, но и натаму останува да важи задолжителното носење на маски на отворен простор. Министерот за здравство Венко Филипче изјави дека оцениле дека е рано да се укине оваа мерка.

„Ние утрово на состанокот на Комисијата за заразни болести разговаравме и за ова, имајќи предвид дека препораките треба да се почитуваат. Викендов бевме сведоци дека огромен број на граѓани, поради топлото време не носеа маски на отворено. Рано е да се даде општа препорака маските да не се носат на отворено. Следен чекор, би бил да се носат маските согласно препораките кои важеа претходно, во група итн. , но за сега е рано. Кога би било тоа, не би можел точно да кажам, можеби за недела, две“, изјави министерот.

Забраната останува да важи и во однос на организирањето на концерти и свадби.

„Сè уште не се дозволени концертите и свадбите, бидејќи стравуваме дека во овие случаи може да се намали дистанцата меѓу луѓето кои се присутни. Затоа одиме постепено. Ако продолжат трендовите, ќе бидат дозволени и концертите.“, рече Филипче.