Расолница, кисела семоќница – Една чашка на ден, здрави како дрен

Ставање кисела зелка за зимница е традиција што ја негуваат многу семејства. Од неа се прави сарма, подварок, се јаде како салата…Секако, тоа оди комплет со расолот, сокот од киселата зелка, кој важи за исклучително здрава и корисна течност. На гостиварски го викаме „ју(в)а“.

Зошто треба да ја пиете? Расолницата изобилува со витамин Ц, а содржи и натриум, железо, калциум. Одлична е во борбата против тегоби во желудникот и цревата, помага при остеопороза, го чисти организмот од токсини и делува против запек. Се смета за природен лек против висок крвен притисок, а во комбинација со лажичка маслиново масло е супер оружје  против камен во жолчката.

Да не заборавиме дека киселата зелка е нискокалорична, што ја прави идеална за оние што сакаат да слабеат. Високото количество витамин Ц, во расолницата ја штити одбрамбената сила на организмот и овозможува и во текот на диета да се остане во полна физичка форма, а воедно да се внесува во организмот доволно корисни материи.

Вреди да се спомене дека овој сок од зелка е одлично средство за освежување, ако сте претерале со конзумирање на алкохол и имате мамурлук. Една чаша расолница експресно ќе го хидрира телото и ќе ги надомести изгубените електролити, па ќе можете да функционирате нормално.

Освен за пиење, расолницата може да ја користите и како додаток во супи и други готвени јадења, на кои нема да им пречи малку киселост во вкусот. Едноставно при варење на храната, додадете неколку лажички.

Трик плус: Ако сакате ју(в)ата да има поубав изглед и фина црвена боја, во бурето каде што ја ставате киселата зелка, додадете излупено и добро измиено цвекло.