Расте бројот на повторувачи меѓу основците

Официјалните податоци кои се однесуваат на состојбата со бројката на ученици во училиштата во Македонија, зборуваат за тенденција на пораст во основните училишта и намалување во средните школи.

Според податоците на Државниот завод за статистика, во учебната 2016/2017 година, во основните училишта има 192.715 деца, што претставува зголемување за 3,6% во однос на претходната учебна година. Средните училишта, пак ги посетуваат

76.394 ученици, што претставува намалување за 4,9% од претходната учебна година.

Загрижувачка е статистиката за основци кои покажале недоволен успех и не прешле во наредното одделение. Станува збор за регистрирани 327 повторувачи, што е за над четириесет повеќе од претходната учебна година. Во средно се бележи намалување на повторувачите од 259 на 214.

Во основните училишта во Македонија најголемиот дел од децата како странски јазик го изучуваат англискиот (192.715), а потоа следуваат германскиот и францускиот. Кај средношколците ситуацијата е слична, со тоа што како факултативен јазик, често се избира италијанскиот.