Разиграно со основците на Ден на танцувањето во Гостивар

Учениците од основните училишта во Гостивар, кои ги сакаат музиката и танцувањето, низ игра и забава се дружеа и имаа прилика да го покажат својот танцувачки талент. Општина Гостивар во соработка со основните училишта организираше Ден на танцувањето, настан што се одржа претпладнево во летниот Амфитеатар покрај Кејот на Вардар.

„Ова е еден натпревар по танцување меѓу основците преку кој сакаме децата да ги покажат своите таленти и секако да имаат убава дружба. Се трудиме да организираме вакви воншколски активности од различни области, особено ликовно, спорт и музика. За децата тие се многу интересни, им го поттикнуваат натпреварувачкиот дух, се дружат и навистина уживаат“, рече раководителката на општинскиот Сектор за образование, Аслијан Снопче.

Сите учесници на настанот добија благодарници, а жири комисија одреди кои изведби беа најдобри, односно наградени со прво, второ и трето место.