Реакција за фотографиите од детското одделение во Гостивар: Сликите се стари, кровот е саниран од април

Во јавноста деновиве, гостиварскиот огранок на Алијанса за Албанците, прикажа фотографии од детското одделение во болницата во Гостивар, за да преку нив укажат дека на „детско“ владеат лоши услови за лекување.

„За тоа што се случува во оваа болница зборуваат самите пациенти и фотографиите од просториите, каде постои страв дека може да се заразите од нечистотијата. Ја потсетуваме и албанската владејачка партија во какви услови работат вработените во оваа болница, а исто така и какви услуги примаат пациентите, нагласувајќи дека повеќето се Албанци.“, изјави Јасин Демири од Алијанса за Албанците, покажувајќи ги фотографиите.

Одговорните од болницата пак, реагираа дека се работи за стари фотографии од пред десет месеци, кога на одделението имало проблем со протекување на кровот и дека тоа е веќе санирано. Повикаа новинарски екипи за да ја покажат моменталната состојба во истите простории.

„Ова се стари слики од пред десетина месеци, и тогаш навистина имавме проблем со кровот. Во тоа време, ги изолиравме тие две простории, дел од ходникот и една соба. Во тој дел не примавме пациенти, а работата си течеше нормално со згрижување на пациентите во останатите соби. Како што можете да видите, кровот е саниран, тоа беше направено уште во април и сега нема никакви проблеми. “, изјави раководителот на детското одделение, д-р Ферид Муча.

Според него, условите во гостиварското одделение се исти, како и во другите болници низ цела Македонија. Муча најави дека со поддршка на Турската агенција ТИКА, во првите месеци од следната година, ќе започнат работи за целосна реконструкција на одделението. „ТИКА веќе го усвои проектот и со нивна помош нашето одделение ќе стане модерно, како во болниците во европските држави“, изјави Муча.