Ребалансот на буџетот станува „жешка“ тема – Таравари vs. ДУИ/СДСМ

Општинскиот буџет повторно станува предмет на недоразбирања помеѓу локалната власт и мнозинството во Советот на Гостивар. Овојпат се работи за ребалансот на буџетот. Градоначалникот Арбен Таравари тврди дека ДУИ и СДСМ намерно не закажуваат седница за ребаланс, и дека тоа ќе донесе проблеми во функционирањето на општината. Тој нагласува дека ребаланс треба да се изврши до 15 јуни, а мнозинството не покажало добра волја да го стави на дневен ред.

„Веќе десет дена буквално ги молиме да се стави на дневен ред ребаланс на буџетот, значи не велиме дека треба да се гласа, да се прифати, едноставно да се даде шанса да се дискутира. Меѓутоа, тие повторно ја играат старата игра. Рекоа дека ја научиле лекцијата од 21 април и 5 мај, но очигледно е дека не научил е ништо и продолжуваат по старо. Ако не се донесе ребаланс ќе има голема пречка во секојдневното функционирање на општината, ние сепак ќе се трудиме да работиме и покрај тоа“, изјави Таравари.

Претседателот на Советот, Насир Муслиу кој доаѓа од редовите на ДУИ, вели дека не се работи за никакво кочење на општината, туку дека се бара соодветен термин за седница. „Ние разговаравме со градоначалникот и тој инсистираше да се закаже седница на 6 или 7 јуни, што се покажа невозможно со оглед на тоа дека повеќе советници не се во Гостивар тие денови. Разгледуваме кој датум понатаму ќе одговара. Не вршиме никакви опструкции“, рече Муслиу.

Откако Таравари седна на градоначалничката фотелја, а мнизинството во Советот падна во рацете на ДУИ, буџетот на Општина Гостивар редовно е „жешка“ тема. Во 2018-та година, препукувањата меѓу двете страни резултираа со недонесување на буџетот во предвидениот рок и општината отиде на мерка времено финансирање, три месеци. Буџетот пак за 2019-та година, беше изгласан во последниот рок (31 декември 2018 година), а на целиот процес на донесување му претходеа безброј закачки и несогласувања.