Рецепт за љубителите на пинџур

Почна сезоната на зимници, а покрај вообичаените ајвар и лутеница, домаќинките секогаш имаат волја да подготват нешто плус, да се најде за назима. Ако во семејството има љубители на лут пинџур, можете да го пробате овој рецепт.

Состојки:

1,5 кг. меснати црвени пиперки
1,5 кг. зелени пиперки
5 до 8 лути пиперки (по вкус)
150 гр. лук
1,5 кг. модар патлиџан
1,5 кг. домати
1 лажица шеќер
1 лажица сол
2 дл. масло, китка магданос, 2-3 лажици оцет

Подготовка: Пиперките, патлиџанот и доматите испечете ги, излупете ги добро и исецкајте ги на ситни парчиња. Лутите пиперки запечете ги и оставете ги цели. Во лонец ставете го маслото да се загрее, а потоа додадете ја смесата од исецканите пиперки, домати и модар патлиџан и пржете сè додека целата течност не испари. Додадете ги шеќерот, солта и ситно исецканиот лук, па продолжете да пржите уште 10-15 минути. На крај додадете го оцетот и исецканиот магданос, како и целите печени лути пиперки, полека мешајќи да не се распаднат.

Вакав подготвениот пинџур се става во топли тегли, кои треба убаво да се затворат и да се остават да стојат превртени, додека не се изладат.