Рецепт за највкусните цимет ролни

Цимет ролните се рецепт на кој секогаш со задоволство се враќаме кога ќе дојдат првите студени и дождливи есенски денови. Зачудувачкиот мирис на циметот што се шири од рерната додека се пече ќе ги разубави и најмрачните утра, а нивниот совршен вкус ќе предизвика насмевка на вашето лице и ќе ви даде доволно енергија за напорен почеток на денот.

Цимет ролните бараат малку повеќе труд и трпение, но крајниот резултат апсолутно вреди.

Потребни состојки:

За тестото:

• 500 гр брашно
• 75 гр шеќер
• 1 пакување (7 g) сув квасец
• 1/2 лажичка сол
• 1 јајце
• 75 мл млеко
• 75 гр путер (стопен)

За полнење:

• 100 гр кафеав шеќер
• 2 лажици мелен цимет
• 50 гр путер (омекнат)

За преливот (опционално):

• 100 гр шеќер во прав
• 2-3 лажици млеко

Подготовка на тестото:

Во поголем сад измешајте ги брашното, шеќерот, сувиот квасец и солта. Додадете ги јајцето, млекото и растопениот путер и убаво измешајте.

Кога ќе се соединат состојките, тестото префрлете го на набрашнета површина и месете го околу 5-7 минути, додека не стане мазно и еластично. Тестото се става во сад подмачкан со масло, се покрива со крпа и се остава да нарасне на топло место околу 1 час или додека не се удвои во големина.

Подготовка на филот:

Додека тестото нараснува, измешајте ги кафеавиот шеќер и мелениот цимет во помал сад.

Формирање на ролни:

Кога тестото ќе нарасне, префрлете го на набрашнета површина и расукајте го во правоаголна форма (околу 30х40 см).

Над валаното тесто рамномерно намачкајте го омекнатиот путер.

Готовиот фил (шеќер и цимет) намачкајте го преку тестото.

Почнете да го тркалате тестото од едната страна, формирајќи тесен ролат.

Исечете го ролатот на 12-15 парчиња и ставете ги во претходно подмачкана тава или плех. (сечењето на ролатот може да го направите со конец)

Печење:

Покријте ги ролните со крпа и оставете ги да нараснат уште 30 минути.

Загрејте ја рерната на 180°C. Цимет ролните печете ги 20-25 минути додека не поруменат.

Подготовка на прелив (опционално):

Додека цимет ролните се ладат, измешајте ги заедно шеќерот во прав и млекото додека не добиете мазен прелив.

Прелијте го преливот врз изладените ролати со цимет и уживајте во ова неодоливо слатко пециво.

Пријатно!